Blir fengselsfuglar mindre aggressive av å ete feit fisk? Femti fangar i Bergen fengsel deltek i eit nytt forskingsprosjekt for å finne svaret.

Kilde: Bergens Tidende

Ei tverrfagleg forskargruppe vil undersøke om fangar i Bergen fengsel får betre impulskontroll, dersom dei et sjømat. Feite fiskeslag er nemleg proppfulle av omega 3-feittsyrer, og forsking viser at fiskeolje kan redusere både aggressiv og valdeleg oppførsel, depresjonar og søvnproblem.

- Vi ventar å finne ein samanheng mellom kosthald og aggresjonsnivå. Personar med lite omega 3-feittsyrer i blodet har gjerne dårlegare impulskontroll enn dei med mykje, seier forskingsleiar Livar Frøyland ved NIFES (Nasjonalt institutt for ernærings- og sjømatforskning). Forskingsprosjektet er eit samarbeid mellom NIFES, Psykologisk fakultet og Bergen fengsel.

Tran ikkje nok
Lene Bakke er ansvarleg for kartleggingsarbeidet i første fase, og har jobba som kokk i Bergen fengsel tidlegare.
- Fisk er veldig godt, men vi kan bli flinkare til å tilberede fisken på ulike måtar, seier ho til BT.
- Kvifor ikkje berre gje tran?
- Nyare forsking viser at det ikkje berre er omega 3 som er viktig. Også mineralar og sporstoff er viktig, og derfor er det viktig med fullverdige måltid, seier Frøyland.
- Kvifor er omega 3 så viktig?
- Marine feittsyrer er svært viktige for sentralnervesystem og membranar. Det er utruleg mange som ikkje et fisk i det heile, og særleg hos desse vil helseeffekten vere stor, dersom dei går frå ingenting til bitte litt. Vi veit at mange som sit i fengsel har åtferdsproblem, og kanskje har dei også låg omega 3-status. Nettopp dette skal forskingsprosjektet freiste å kartlegge.

Hele artikkelen